اللي حَبك .. قبل أحبك !

من طرف **Yasmina** الأربعاء سبتمبر 22, 2010 3:51 pm

من زمااان ..
و أنا نفسي ..
أسألك هذا السؤال :
اللي حَبك .. قبل أحبك !
حَسّْ مثلي بـ هالجمال ؟!
حَسّْ إن الدنيا روعه ,
و كل شي فيها .. خيال ؟!
حَسّْ قلبه .. مثل نجمه ..
وإن صدره ,
ممتلي بـ ضيّ النهار ..
وإنه مهو إنسان عادي !
و إنه أقرب للكمال ؟!
اللي حَبك
لما حَبك ..
صارت إيدينه مرافي ..
للصباحات النديَّه ؟!
وصار قلبه ..
للأغاني البِيض .. جال ؟!
سولفي لي :
كان يكتب لك قصايد ؟!
كان يرسم فـ الورق ,
قمره بـ جدايلها الطوال
وكان يقول لك : تشبهك ..
بس .. ناقصها يصير ..
فـ الخد .. خال ؟!
وش كان يقول عن ضحكتك ؟!
كان يحسّْ .. بـ إنها ..
أجمل موسيقى
وإن لها .. في نهايتها
ظلال ؟!
ولما كنتي تسولفين
كان مثلي
يجمع الورد ويغبّي .. بـ السّلال ؟!
كان دايم يذكر الله
لا مشيتي ,
وانتثر عِطر الخزامى !
فوق وجه الأرض .. سال ؟!
وشْـ يقول لما يشوفك ..
تشرحين اللِّيْن .. للغصن الطري
تعلّميْـنه :
ألف
.. باء
... تاء الدلال ؟!
كان يسولف للبنات
عنّك انتي ..
وعن هواك اللي خذاه
و ما ترك لانسانه غيرك
في نظر عينه مجال ؟!
اللي حَبّك .. قَبل أحبك !
عمره ما حَسّ بغرور ؟!
ولمّا كنتي تخطرين إنتي في باله
ما يحِسّْ بـ كُبْر حظه ,
كُونِك إنتي .. له وحْدِه !
له .. من بِدّ الرجال ؟!
اللي حَبّك .. قَبل أحبّك !
هو شافك ..
مثل ما أنا أشُوفك :
شي كبير ,
ونعمه تستاهل شكر !
حتى لا يجيها الزُّوال ؟!
مو مُهم تْجاوبيني ,
بسّْ نفسي أسألك ..
من زمان .. هذا السؤال !
اللي حَبك .. قبل أحبك !
هُو صحيح ..
إنّه بعد فرقاك .. حيّ !
ولا يزال ؟!!!!!!!!